Վանաձորի մասնաճյուղ

ԵԹԿՊԻ-ի Վանաձորի մասնաճյուղը կազմավորվել է ԽՍՀՄ և ՀԽՍՀ ժողովրդական արտիստ Սոս Սարգսյանի և ՀՀ ժողովրդական արտիստ Հակոբ Ազիզյանի ջանքերի շնորհիվ: Բարդ և երկար նախապատրաստական աշխատանքներն իրենց արդյունքն են տվել 2003 թվականին, ՀՀ վարչապետ Անդրանիկ Մարգարյանի և այդ տարիների Լոռու մարզպետ Հենրիկ Քոչինյանի օգնությամբ տեղի է ունեցել մասնաճյուղի բացումը:

Տնօրեն է նշանակվել ՀՀ ժողովրդական արտիստ, թատրոնի և կինոյի դերասան Հ. Ազիզյանը: 2003 թվականին բացվեցին «Թատերական արվեստ», «Հեռուստառեժիսուրա», իսկ հաջորդ տարիներին նաև՝ «Պարարվեստ» բաժինները: Հակոբ Ազիզյանի ջանքերով ձեռք բերվեցին բեմիրեր և բեմական հագուստ, որի անհրաժեշտությունը կար նորաբաց մասնաճյուղում: Թատերական բուհին սկզբում տրամադրվեց առաջին երկու, ապագայում 3-րդ և 4-րդ հարկերը ևս: Բազմաթիվ շրջանավարտներ համալրեցին տեղի թատրոնների դերասանական կազմը:

2013 թվականից տնօրեն նշանակվեց դերասանուհի, ռեժիսոր Սոֆիա Սողոմոնյանը, որի ղեկավարման տարիներին պատգամավոր Է. Մարուքյանի և Լոռու մարզպետ Ա. Նալբանդյանի շնորհիվ վերանորոգվեց բուհի անմխիթար տարածքը: Մասնակիորեն համալրվեց գրադարանը: Ս. Սողոմոնյանն ավելացրեց ջեռուցման սարքերը: Կազմակերպվեց մի քանի վարպետության դաս և հանդիպում: 2019-2022 թթ. Կատարվեց շենքի ամբողջական վերանորոգում: Բուհը ժամանակավորապես տեղակայվեց Վանաձորի թիվ 10 դպրոցում: Բուհը մի քանի անգամ համագործակցեց Ֆորտունա հեռուստաընկերության հետ: Ս. Սողոմոնյանը ուսանողների հետ բեմադրեց և որոշ համայնքներում ներկայացրեց Է. Զոհրաբյանի «Մկստանի պատմությունը» հեքիաթ- ներկայացումը:

Սկզբնական շրջանում ինստիտուտը գործել է Հովհ. Թումանյանի անվան թիվ 3 դպրոցի տարածքում, իսկ այնուհետև Մ. Թավրիզյանի անվան արվեստի պետական քոլեջի աջակողմյան թևի առաջին, երկրորդ, ապա նաև՝ երրորդ և չորրորդ հարկերում:

Այն թատերական արվեստի ուսուցման միակ բարձրագույն ուսումնական հաստատությունն է Լոռու մարզում, լավագույն դարբնոցը ապագա արվեստագետների համար: Շրջանավարտներն ու բարձր կուրսերի ուսանողները աշխատում են քաղաքի առաջատար ստեղծագործական օջախներում՝ Հովհ. Աբելյանի անվան պետական դրամատիկական թատրոնում, Վանաձորի քաղաքապետարանի «Հորովել» երգի-պարի անսամբլում և կամերային երգչախմբում, «Բոհեմ» կամերային թատրոնում, տիկնիկային թատրոնում և իհարկե տեղական և հանրապետական հեռուստա և ռադիո ընկերություններում: Մինչև 2022 թվականը մասնաճյուղում կար «Հեռակա» բաժինը, սակայն թե՛ Գյումրու, թե՛ Վանաձորի մասնաճյուղերում փակվեցին դրանք:

Մասնաճյուղում երկաստիճան ուսուցման համակարգ է՝ բակալավրիատ և մագիստրատուրա, իսկ կրեդիտային համակարգը ներդրվել է 2012 թվականից: Ուսումնական գործընթացը կազմակերպվում է մայր բուհի կողմից հաստատված և ժամանակակից չափորոշիչներին համապատասխանող ուսումնական պլաններով և ծրագրերով:

2019 թվականի երկրորդ կեսից մասնաճյուղի տնօրեն է նշանակվել բանասիրական գիտությունների թեկնածու, դերասան, գրող Էլֆիք Զոհրաբյանը, որի ջանքերով կազմակերպվեցին վարպետության բազմաթիվ դասեր, համակարգեց «Օկտավա» հեռուստանախագիծը՝ հմագործակցելով Լոռի հեռուստաընկերության հետ, տեղի ունեցան դասախոսների վերապատրաստման դասընթացներ, մասնաճյուղի դասախոսները մասնակցեցին հանրապետական ու միջազգային գիտաժողովների՝ գրանցելով հաջողություններ: Նոր, բարձրակարգ մասնագետների համալրում տեղի ունեցավ, ավելի քան տասներկու դասախոս հրավիրվեց մայրաքաղաքից, բուհը համագործակցեց Գյումրու մասնաճյուղի հետ: Մասնաճյուղը մասնակցեց նաև միջբուհական մրցույթի և հաղթող ճանաչվեց «Թատրոն» անվանակարգում, միջազգային մրցանակների արժանացան ԵԹԿՊԻ Վանաձորի մասնաճյուղի ուսանողուհին և դասախոսները, «Պարարվեստ» բաժնում ավելացան տեղերը, իսկ մագիստրատուրայում բացվեց «Պարարվեստ» բաժինը և կամընտրական առարկաների ընտրությունը թողնվեց ուսանողներին: Ստեղծվեց որակի ապահովման հանձնաժողով, որն իրականացնում է դասալսումներ և վերահսկում է կրթության որակը: Որոշ ուսանողական բեմադրություններ ներկայացվին հանդիսատեսին: Ստեղծվեց դասախոսների տարակարգի անցկացման ավանդույթ: Համագործակցումների արդյունքում անհրաժեշտ իրեր ձեռքբերվեցին բուհի համար, ստեղծվեցին մասնաճյուղի ֆեյսբուքյան էջը, յութուբյան ալիքը: Բուհի հանդեպ աճեց նվիրատվությունները գրքերի, բեմիրերի և այլ անհրաժեշտ իրերի տեսքով: ԵԹԿՊԻ միջազգային բաժնի հետ համագործակցության արդյունքում ամերիկացի բարձակարգ մասնագետներ անցկացրին վարպետության դասեր՝ մասնաճյուղը գնահատելով որպես «լավագույնը մասնակիցներից» և այլն: Մասնաճյուղի նորարարություններից է նաև «Պարարվեստ» բաժնի մի քանի առարկաների քննությունների անցկացումը բեմում՝ որպես բաց քննություն-համերգ: 2023-ին Վանաձորի մասնաճյուղի ուսանողները մասնակցեցին Ծաղկաձորում տեղի ունեցող վարպետաց դասերին՝ ГИТИС-ից ժամանած մասնագետների կողմից: «Ուսանողական գարուն» փառատոնում Վանաձորի մասնաճյուղը «Թատրոն» անվանակարգում գրավեց առաջին տեղը: Է. Զոհրաբյանի ղեկավարած մեկ այլ կառույց՝ ՀԹԳՄ Լոռու մարզային բաժանմունքին կից դրամատիկական ստուդիան, մեկ տասնամյակից ավել տարիներ կադրեր է տրամադրում ԵԹԿՊԻ-ի Վանաձորի մասնաճյուղին «Դերասանական արվեստ» և «Ռեժիսուրա» բաժինների համար: Ներբուհական աշխատանքներին հաճախ նպաստել է տնօրենի անձնական ներդրումը: 2023 թվականի սեպտեմբերին շենքը հանձնվեց շահագործման: Տնօրենի նախաձեռնությամբ բուհը ձեռքբերեց քանդովի-հավաքովի ժամանակակից բեմ, լուսային տեխնիկա և ցնցուղներ լոգարաններում:

Մասնաճյուղի շրջանավարտներն ու բարձր կուրսերի ուսանողները աշխատում են քաղաքի առաջատար ստեղծագործական օջախներում՝ Հովհ. Աբելյանի անվան պետական դրամատիկական թատրոնում, Վանաձորի քաղաքապետարանի «Հորովել» երգի-պարի անսամբլում և կամերային երգչախմբում, «Բոհեմ» կամերային թատրոնում, տիկնիկային թատրոնում և իհարկե տեղական և հանրապետական հեռուստա և ռադիո ընկերություններում, Ալավերդու, Սպիտակի, Ստեփանավանի, Լոռվա գյուղական տարբեր համայնքների մշակութային օջախներում, կրթական հաստատություններում, նկարահանվում են ֆիլմերում ու սերիալներում, զբաղեցնում պաշտոններ:  Բուհը համագործակցում է բազմաթիվ մշակութային օջախների հետ:

Այստեղ դասավանդել են և դասավանդում են ՀՀ ժողովրդական արտիստ, պրոֆեսոր Վահե Շահվերդյանը, ՀՀ վաստակավոր արտիստուհի, պրոֆեսոր Գրետա Մեջլումյանը, ՀՀ ժողովրդական արտիստ Վոլոդյա Գրիգորյանը, ռեժիսոր Մայիս Ռաֆայելյանը, ՀՀ վաստակավոր արտիստ Վրույր Հարությունյանը, արվեստագիտության թեկնածու, դոցենտ Սառա Նալբանդյանը, արվեստագիտության դոկտոր, պրոֆեսոր Գրիգոր Օրդոյանը, արվեստագիտության թեկնածու, պրոֆեսոր Նարինե Սարգսյանը, բանասիրական գիտությունների թեկնածու, դոցենտ Վալերի Փիլոյանը, բանասիրական գիտությունների թեկնածու, դոցենտ Գայանե Մալումյանը, ՀՀ մշակույթի վաստակավոր գործիչ, դոցենտ Սիրանույշ Ղուկասյանը, դերասանուհի Արմինե Անդրեասյանը, բալետմայստեր Արայիկ Գևորգյանը և ուրիշներ: