Վարպետության դասեր Վանաձորի մասնաճյուղում

Երևանի թատրոնի և կինոյի պետական ինստիտուտի Խորեոգրաֆիայի ամբիոնի դասախոսները վարպետության դասեր են անցկացրել Վանաձորի մասնաճյուղում:

Խորեոգրաֆիայի ամբիոնի վարիչ Լիանա Հակոբյանի «Փորձավարություն և պարարվեստի ռեժիսուրա» վարպետության դասի ընթացքում ուսանողները հնարավորություն են ունեցել խորապես ծանոթանալ փորձավարության ժամանակակից մեթոդներին և ռեժիսուրայի նորագույն միտումներին: Դասի ընթացքում շեշտադրվել է փորձի կարևորությունը ժամանակակից բեմադրությունների ընթացքում, ինչպես նաև ռեժիսուրայի նպատակային կիրառումը տարբեր պարային բեմադրություններում:

Լիլիթ Փալանջյանը «Դասական պարի» վարպետության դասի ընթացքում ներկայացրել է դասական պարի տեխնիկական նրբությունները և մոտեցումները՝ ընդգծելով շարժումների ճշգրտությունն ու դասական ոճի պահպանման կարևորությունը: Այս դասը հնարավորություն է տվել ուսանողներին կատարելագործել կատարողական հմտությունները: Իսկ Էդգար Կարապետյանը վարել է «Հայկական պար» վարպետության դասը, որը ներառում էր հայկական պարերի առանձնահատկությունների ուսումնասիրությունը և դրանց կիրառումը:

Վարպետաց դասերը մեծապես նպաստել են Վանաձորի մասնաճյուղի ուսանողների մասնագիտական հմտությունների զարգացմանը: